|  موضوع: ألعب بالآبيات لعب بليه بالكوره الجمعة يونيو 19, 2020 9:38 am | |
|
ألعـب بالأبيـات لعـب بليـه بالكـوره
والشعر عدة بحور وغصت أنـا بحـوره
وإن كان به فلسفة للشعـر بتفلسـف
بقول شعـر(ن) يخلـد بعـدي سطـوره
إحساسـي إن الشعـر دولـة وحاكمـهـا
أنا زعيمه وساكـن فـي أفخـم قصـوره
وشفت القصيـدة حبيبـة لـي وتعشقنـي
تسكن معي في القصر بالحيـل مسـرورة
والأبيات عنـدي خدم بالأمـر تأتينـي
لحتجتهـا جـات منهـيـة ومـأمـورة
وكـل شطر(ن)يحـاول يسبـق الثـانـي
مع إنهـا كلهـا قدمـي وفـي الصـورة
وكـل كلمـة تعـانـد مــع خويتـهـا
والثانيـة خاصمـت الأولـى ومقهـورة
ومافيه حرف(ن) من الأحـرف يعاندنـي
الأحرف طوابير كل(ن) يحتـري دوره
ونقـاط مادلـت أحرفهـا مـن الدهشـة
ضاعت من حروفهـا دهشـة ومذعـورة
وفكري كمـا الكمبيوتـر هـو يبرمجهـا
كـل المعانـي بوسطـه دوم محصـورة
وناظرت أنا ساحـة الشعّـار مستغـرب
اللي على الشعر له سلطـة ولـه شـوره
حـاس الجمـل كلهـا وغيّـر مواقعهـا
جمـل رفـع حطهـا باليـاء مجـرورة
وجـاب أحـرف بجملـه مالهـا خانـة
وعنوانه أرخاه حطه بسفل سطـورة
لكـن مهمـا تغيّـر داخـل السـاحـة
كـل الحقايـق عرفنـاهـا ومخـبـورة
شعّـار وفـحـول جزلات(ن)معانيـهـم
لكـن هذا الفحـل قـد غـاب جمـهـوره
وفـيه شعّـار يدبـل شعرهـم كـبـدي
تقـول ورعـان وتشخـبـط إبسـبـورة
وإن ماكتبـو زيـن واجتهـدوا بنفصلهـم
والمشكلة بعضهـم شعّـار مشهـورة
وأشره على كـل مـن ينشـر قصايدهـم
وهـذا يبيّـن لنـا الإعـلام وقصـوره
الإعلام ناسـي فطاحـل مـادرى عنهـم
متجاهل إبداعهـم ماإهتـم فـي ظهـوره
عصر(ن) غريب(ن) وسطه عالم أغـرب
والأغرب إني بجيل(ن) ماأفهـم شعـوره
عايش بعصر(ن) ولكن ماهو بعصـري
عصري مضى له سنين وولـت دهـوره
مضـى مـعـي المتنـبـي والحمـدانـي
وبشار الأعمى وأبـي نـوّاس وخمـوره
ولو كنت من جيلهم حطيـت لـي بصمـة
وحليت لـي مشكلـة بالكتـب مذكـورة
المتنبـي وسيـف الـدولـة أصلحـهـم
وماكان أحمد عرف مصر(ن) وكافـوره
وكل المشاكل تحل ببيـت مـن شعـري
والحمدانـي إبيـتي يـزيـن منـظـوره
ويصيـر أبوالطيـب أقـرب له مـن ظلالـه
وأبو فراس(ن) يخيـب وتكثـر عـذوره
هـاذي أمانـي وانـا مانـي محصلـهـا
أطلب لبن للأسف مـن عنـد عصفـوره
وكنت أتمنـى أعيـش إبعصـر يسبقهـم
عصر الجهل ولّت سنينـه مـع شهـوره
مع أمرؤ القيس والأعشى وابن أبي سلمـى
وأعيش وسط الجهـل وتزعـم عصـوره
وأعيـش أنـا بينهـم جاهـل ومتعـلـم
أجهل أن في الردى وأغيب أنا في حضوره
جاهل مانافـق ولا أتجاهـل بنـي عمـي
رفيقـي آعزمـه ماأقـصـر شـبـوره
وأجهـل بهـرج القفـى والحقـد والنمّـة
وناس(ن) تسب بقفـاي أقـول مشكـوره
مـن سبنـي أو غلـط ماأقول لـه جـابـة
وإن زوّد الهـرج أنـا لعنـت طابـوره
ومتعلم(ن) المراجـل مـن صغـر سنّـي
من شايب(ن)الكـرم والطيـب دستـوره
بغيّـر السالـفـة وأحكي لـكـم قـصـة
قصة جرت لـي مـع حلـوة وسنيـورة
أحبهـا وهـي تفاخـر بـي وتتبـاهـى
ومن حق آحبهـا والبنـت معـذورة
لكـن هالبنـت تعشـق مــن يقابلـهـا
وكم ناقص بكثر ماله جـات فـي زوره
ووالديهـا أنــا عـجـزت لحصيـهـم
لكـن مافـيهم اللـي وافــق آزوره
خطبتهـا مـن ثلاثـة منهـم وعـيّـوا
وزوجوهـا لخبـل(ن) تقصـر شبـوره
والناس راحوا مـع هالخبـل فـي صفـه
وقلدوا هالخبل في اللبـس وعطـوره
وفـي النهايـة أخـذت البنـت بالـقـوة
وعيّشتهـا فـي الحيـاة وقبـل مقبـورة
وعشت جنـب الخبـل والنـاس تعشقنـا
والبنت عاشـت معانـا بـس مسعـورة
تعشق ولا تفـرق المسلـم من الكافـر
ويشهد عليهـا الولـي ماهيـب مستـورة
واللي أنا أستغربـه أنثـى تعشـق أنثـى
من ضمن عشـق البنيّـة سـارة ونـوره
ومابـه غرابـة وزيـد يحـب حـمـودي
وحمـود ماينقصـه يـاكـود تـنـورة
أوضاع بعض الشبـاب اليـوم مختلطـة
من بعد خلطـه سكـن عكسـه بمالبـوره
الناس راحـت قـدم يامعشـق الرِيـوَس
توقـع بمـوتـرك فقـعـت مـاطـوره
هـدي أمـورك وأنـا بحـاول أهــدي
وبنهي القصيدة قبل لا تصيـر محظـورة
ومعلقـات الشـعـر كتـبـت ثامنـهـا
من بعـد سبـع(ن) قديمـات(ن) ومعمـورة
وإن كان شعري هيـاط إف إيـه بهايـط
وأقـول وأفعـل ولا نفسـي بمـغـرورة
| فرح يعجبه هذا الموضوع |
|
| | موضوع: رد: ألعب بالآبيات لعب بليه بالكوره السبت أغسطس 08, 2020 7:53 pm | |
| نص جميل جداااا
سلمت يداك وذوقك الراقي | |
|
ألعب بالآبيات لعب بليه بالكوره
السبت سبتمبر 07, 2024 11:07 am